MNF sawrkar Budget Session hnuhnungber dawttu neih zawh hlima ka ziah nimahse, ka'n dahchhuak ve leh hnuhnawh a ni.

Mizoram Budget Session chu neih zawh a ni in, kan ram leh sum dinhmun kan hria a. Chumi rual chuan kan ram hruaitute tawng kau chheh duh dan leh dinhmun hrang hrangte kan hre tel bawk. Chu chuan kan ram dinhmun derthawn zia leh dahlau zia min hriat chian tir a, Budget session hnu lama kan ram hruaitute tawngka hrang hrang kan hriat atang leh chanchinbu lama kan thil hmuh leh chhiar thin te chuan kan ram chu dinhmun hlauhawm takah min din tir leh zual niin ka lo hre ve mai mai a.

    Ruling lam emaw, opposition lam emaw pawhin tawngkam kan duhtui lo tlang hlein ka lo hmu ve a. Chuta thil langsar tak lo lang chu HEL chung chang hi a ni. Inpuhmawhna leh inchachhuahna lian tak mai a rawn thlenga, mipuite rilruah leh rilru mai ni lo a lang apau pawhin inhnialna nasa tak mai a rawn hring chhuak nghal bawk. Duh duh kan sawitheihna ram, ram zalena awm kan nih miau avangin kan ngaihdan leh duhdan pawh kan sawichhuak hnem narawh e. Kan hruaitute tawngkam aia thui thui kan tawng chhuak ta hlawm a nih hi. Chutah chuan ka hmuhdan leh thil awm thei kan ram dinhmun derthawnna thleng thei ni a ka hriat hi dik ngei pawhin ka ring a, sawi chhuah loh theih niin ka hre lo.

    Hel tih tawngkam chuan kan rilruah hmun a chang lian ta hle mai. Kum 20 liam ta a Mizoram buaina chung chang kha rilruah a rawn lang nghal zuau zuau a. Kan ram hruaitute inkara hel rilru pu ti a insawi thawm ka hriat phei chuan ka lo ip zawr zawr mai. Hun liam tawh a thilhluite sawi chhuak duh kan la awm cheu hian ram leh hnam ni lova mahni tang hma chauh hai thintu hruaitu kan la ngah zia min hriatchhuahtir a. Thu mu hnu kai tho zawng leh kum 20 kal ta thil sawi chhuah deuh zuau zuau a han ni ta mai hi a lungchhiatthlakin Mizorama cheng Zofate kan la puitlin loh zia leh kan hmabak la ko zia chu a hril nghal mai awm e.

    Kan chhehvelah chi leh chi avanga inthah buai buaite kan hria a, an in kap hlum rem rum a, hnam khat leh hnam khat an indoin an in tihlum pheng phung tih kan hria a. Chutih laiin Mizoram chhunga cheng Zofate erawh ram buai karah pawh chi leh chi ang emaw, Mizo leh Mizo anga inthah buaina ang chi a thlen thu kan hre lo. Mahse, tuna kan ram hruaitu tam takte thu veivir duh dan leh thu kalpui duhdan tam tak hi chuan kan ram hi dinhmun hlauhawmah an dintir tih hi hre teh se. Zalenna sual nilova hel tih tawngkam ringawt an hman chuan Zoram dung leh vanga mi tam tak thinlai mu hnu a kai tho thei a ni. Chuti a nih si chuan kan hmabak chu a eng vak lo ang.