Kum 10 liam ta kha chu ni se he thupui hi ziah chu sawi loh a van tul lo e ti kan tam ngei ang a.  Suangtuahna mai mai kan ti ngei ang. Mahse, tunah zawng a tak ramah kan cheng a, kan cheng mai ni lovin kan liluh tan mek chu a nih hi. PHE, PWD etc.. department-te chu an hming kan hre lar hlur a, mahse kan hriat ngai loh leh Mi ram leh State dangah chauh awm tura kan ngaih IT Deparment hmingte pawh a ri zuau zuau tan atangin, a engamah hmain HOD-ah te kan lo buai tan nghal der a, chu IT chuan kan ram hi eng angin nge hma min sawnpui dawn a, eng kawng nge min zawhpui dawn tih ding dihlipin kan thlir mek ta chu a nih hi. Kan department lama mithiamte leh kan ram hruaitute hian Mizoram thalaite hmasawnnan IT chu tangkai taka chhawr theih turin ruahmanna fel fai tawk nen an rawn chhawp chhuak zel ang tih beiseina nen lo thlir phawt teh ang. Chutih rual chuan chu IT-in a ken tel lian ber ti a sawi theih Internet chung changa kan thlen chin leh hma thlir tlem bakah keini Kristian thalaite mawhphurhna tlem kan sawi lang tel dawn a ni.

TAPCHHAK SIRA THINGPUI SEN SA HANG LEH NEW YORK NULA/TLANGVAL LAPTOP
Technology a zuan a zuang chu zuang sang viau mahse, hniak zawma a kal miau avangin Mizoram, India hmarchhak state kilkhawr tak mai pawh chu min rawn zuan ka hlen bik hauh lo mai a. Computer tih ri kan hriat atanga rei loteah, kan lo insawi mak siak thin chu a tak ngeiin kan hmu mai ni lovin Zooma leh Card khelh nan kan hung ta del dul mai a. Chumai a ni lo Internet-ah chuan duh duh a en theih zahmawh film pawh a en theih ti a kan hriat chu, Chutiang ngawt a tan lo deuh, nula leh tlangval inrim nan pawh a tha tih kan hre ta zel mai. Zan tir lama Lengi tapchhak zawla thingpui sensa hang in thin khan zan tairekah pawh New York khawpui leh London vela nula leh tlangval awmte chu hmangaih biahthu kan inhlan ta zak zak mai a nih hi. Mahse maw Mizo te hi chu kan than theih lohna pakhat kan ti hluai a, a tangkaina pawh tak tak si lovin kan hun hlu tak leh sumpai khawralnan kan hmang thiam hmasa ta phawt thin hi a buaithlak ta chu a ni.

DELH HLUM SA EI TUM THALAI KAN PUN PHAH
Ram chhung leh ram pawnah mu chi kan tam phah ta tlat mai. Zanah rei tak tak thleng kan men avangin zing thawh kan peih lova, chhun vang lai thlenga nula tlangval la mu burh burh an pun phah ta hluai mai. Chu chuan nghawng tha lo tak mai a rawn nei zui a, zirna kawngah kan tlak hniam phah a, kan tihtur tam tak kan tihtheih loh phah bawk. Thil tangkai tak ni si kha kan lo mut bopui leh vel mai mai a. Ram dangah chuan tangkai taka hmangin zirlai leh zirlai kher lo pawhin sum siam nan leh an zirlai a tante, hna zawn nan te an hmang thin tih kan hre rei ruai a, mahse ziktluak turin kan bel chiang leh peih si lo, kan peih chin zawng kan ti a, kan thawhsan leh daih si. Hre ve nil nial chhawr tlak si loh Mizoram zirlai tam tak ang hi Internet kan hman tan dan pawh a ni ber awm e. Chutih lai chuan Mizo thalai tam tak chuan an hmang tangkai tak zet tih hre tel ila.

KAN RAM CHANCHINBU KAWM/CHHUNG A TIH DEUH HUAU PHAH EM?
Internet chu a hman tangkai dan kan han thiam leh deuh a, chanchinbu lam ten thu leh hla lak nan ber an hmang chho a, kan thalai hmangtu tam tak pawhin hla leh a thu te, tutute emaw thlalak download nan te kan hmang ta tak tak a, a duh thawh deuhin a video thlengin. Mahse maw kan magazine tam tak hian thlalak tha leh beng var thlak tak tak emaw , Kristian nun lam hawi thlalak emaw ai chuan nula saruak keng kung leh chutiang lampang chi, chanchin mawi lo deuh tute emaw chet chhiatna lak chhawn nan an hmang tangkai leh ta phian mai. Mahse an chanchinbu hralh a tlak phah ve miau si a, khawvel mit atang chuan an demawm hran lo ve, an sumdawnna  a ni miau a lawm le.

KRISTIAN THALAITE I LILUH VE ANG U
Internet Chatting chung chang kan hria a, Kristian Thalai tam tak hi chu thil experienced tawhtute chu kan ni. A that lohna tlem kan sawi tawh a, kan sawi aia tam fe a that lohna sawitur a la awm awm e. Mahse, heng changkanna te hi Setana hmanrua a ni vek kher lo. Pathian tana kan hman thiam chuan hlawk takin a hman theih a ni. Website emaw, Internet chatting hmangin emaw, mite tan malsawmna kan ni thei a ni. Kan duh emaw duh lo emaw Internet khawvelah hian kan lut thuk tulh tulh dawn a, kan nitin nunah hian a la bet tlat dawn a ni. Kum 2004 November thla khan Internet a tha zawnga hman a nih theihnana hmalatute chuan Youth Internet Ministry an din a, Website te siamin Online counseling-te thlengin an tichho a ni. Kristian Thalai ten kan luh chilh ve a ngai a, kan hriat ve a tul a ni. A tha lo ti leh ringawt thin lovin a tha zawnga hman I tum zawk ang u. I Online hun-ah Kristian Thalai I nihna hre rengin online thin ang che.

INTERNET HI HMASAWN NAN HMANG RAWH
Internet hman changa Zahmawh website leh thlalak bawlhhlawh tak tak en nan bakah, chat ringawta I hun khawhral thin I nih chuan  inbihlet fe I ngai a ni. Zirlai I nih chuan I zirna tanpuituah I hmang thei a, I duh ang zir zo tawh I nih chuan hna zawn nan I hmang thei bawk. Min an ti thin tih ringawt ni lovin Kristian thalaite chuan a taka tiin hman tangkai I tum ve ang u. Thlirtu ni ringawt lovin a fawng vuantua tan ve zel hi tum theuh ila, min tithuanthutu ni lovin hmasawnna thlentuah hman tum ve ngei ang che.

Internet hman sual theihna leh a that lohna hrang hrang kan hmuh leh kan hriat thinte hian kan ngeng hi chhun se,  Kristian Thalai kan nihna anga kan tihve tur hre chungin kan hmabak a kan tawn ngei ngei tur thil hi I hmachhawn zel teh ang.  Kan thlen chin a piang kan ram a ni dawn si a.