Thliin kawngkhar chu a chhem a, a invaw ri thuaiah chuan ka harh chiang khawp mai. Chu chu kan Lalpa kum sanghnih pasarih, Nikir thla ni sawm Pathianni tuk, zing dar nga kha a ni. Khua chu a veng em em mai a, van dumpawl a lang ruih a, fur lai mah nise, khati taka khua a han thiang mai kha chu lung a leng a, ka theihnghilh leh tawh lo vang.

Thliin kawngkhar chu a chhem a, a invaw ri thuaiah chuan ka harh chiang khawp mai. Chu chu kan Lalpa kum sanghnih pasarih, Nikir thla ni sawm Pathianni tuk, zing dar nga kha a ni. Khua chu a veng em em mai a, van dumpawl a lang ruih a, fur lai mah nise, khati taka khua a han thiang mai kha chu lung a leng a, ka theihnghilh leh tawh lo vang.

    Chhim lam chu varandah atang chuan ka thlir a, ram pharh lawilen nuam hmel tak, mahse tlangdung te te in khawh khamphei chu chhiar hleih theih lohin a chik hrup a, hla leh deuh tlang sang deuh khamphei zut leh pawng deuh chu a lang paw chuk a. Thlawhbawk nge khaw te deuh tih erawh ka hre lo, rangva chung pali panga lo de tliar chu ka hmuh hmaih lo, eng khua nge a nih ka hre lo thung. A hre deuh han zawh tur reng an awm si lo. Chung ram leh tlang hring nghulh kara mautam ro rirete erawh chu pawl tlak hnu a kum leha buh kung ding ruah nan hnu ni awm takin a lang a. Chung te zawng zawng ai chuan, tlang deuh reuh, a bul vel a khua hual, khaw lian lo taka rangva in niin a chhun tlette chuan ka mit an la zawk fe si.

    Ni, rangva in a ni, ka theihnghilh ngai lo. Mahse tuna ka khaw thlir mek, ralkhat hla taka mi chu a ni lo thung, hmana mi kha min hriat chhuahtir a ni zawk. An chenna chu rangva in, a chhuat thingphel, a bang dap thumbawh kaihsawih thuah a ni a. A ni leh thla, kum ka hre tawh lo, mahse nimina thil thleng tluk kha ka mitthlaah erawh a la chiang a, a la cham reng thung. Nikir thla a ni a, ruah mual liam a sur buan buan a, a bang chiah chu awihawm loh khawpin khua chu a thiang leh ta em em a. Van dumpawl hi a lang ruih mai a, sang takah chuan mute thlawk thlifim dawng chu a dir cher cher a, vamur an thlawk sep sep bawk.

    A eng ber nge a chhan pawh ka hre lo, chu inah chuan ka tek lut rawih a. Puii chuan puan a lo tah a. A sam sei ngil dum hlap mai chu a fai a ni tih hai rual loh hian a tle der der a, tukverh thlang lam atanga thli rawn thaw chuan a chhem phe siau siau a. Ka lut chu min lo be mai lo a, a mak lutuk, chiang em em sawi thiam hleih theih loh hian ka mit takah hian min lo en a. Kei pawhin a mitah chuan ka en a, ka zak chu ka kimki chawih chawih a. Eng emaw hnu chuan a ni zawk chuan, enge i duh a i lo len ve teh mial, a lo ti a. Chu chu a ni, a bul intanna chu. A hma pawhin kan inhre em em a, mahse khami ni atang khan a ni, kan inhriat chu. Ka lo leng ve mai mai, tih bak sawi tur ka hre lo, ka hre miah lo. Ngawi rengin a bula an thutthlengah chuan ka thu a, sawi tur hi a vang em em mai a, ka thinphu hi a ri dup dup a ni ber mai. Amah zawk chu a tawng seuh seuh a, a khat tawka lo nuih mai loh chu han titi ve tur ka hre hlawl si lo.

    A tu te mah mah chuan sawi chhuak lo mah ila, kan kara hmangaihna chi inphum zung kai tura lo puam tan ik ek chu a hminga mipa fa, mi a nileng ni bik lo tan erawh haider rual chu a ni thung lo. Chu chi tuha lo awm ta chu, a tawi zawngin sawi ila, a lo tiak ta kha a ni a. Ani nen khan kum khat zet chu kan inzui a, mite pawhin an hre lo bik lo. Khuangchawi thla hleinga zana kan khaw kiang veng chung tlang chip thengthaw tak, phaitualhnimin a bawm hrin nghelhna hmuna lungchim em em a, duhtawk reng reng nei lo leh kham tih pawh awm lo leh nghet taka kuaha a heh sen vam ham maia ka fawh vawng vawng takte kha aw, a hnua ka hreawmna leh ka beidawnna tahkhua tiseitu tur mai a ni dawn tih hria ni ila aw, ka va han pawiti dawn em!

    Hun kha leh chen kan inzui a, tumah reng hi kan ngai bik lo va, kan pahnih khan kan hlim tawk thin. Kan chanchin kha sawi dawn ni ila, sawi tur a van tam em. Mahse sawi vek a tha ber lo va, a tul hek lo. Hei hi erawh ka sawi duh. Ka tan chuan ui reng reng a nei lo a, ka tih ang chu hnial pawh a nei hek lo. A tangah beiin duh takin ka fawp vawng vawng a, hmun fala awma hmangaihtu tang bela duh taka fawh a, kuah vawng vawng hi zawngin, sawi tam a ngai loin mipa ve lem tan chuan han insum zawh rual a nih tawh thin loh hi chu kan hrethiam vek ang. Chutiang a boruak chim chin a san tawh hle a, ka thaw-ah leh chet phungah hmangaihna vawr tawp rama khawsak mai loh chu engmah dang reng ka ngaihtuah thei tawh lo a ni tih a hriat tawh chinah thung chuan, ka thin tihur hlau em em si leh nui chung reng zela tlanchhiata pumpelh dan a thiamzia tak thin te kha aw, a mak ka ti tawp thei hlawl lo.

    Keimah zawk boruak a so san tawh avanga kut ka thlak hial tumte pawh a awm. Mahse a nui hmel lo chu chhana dang ka dawng ngai lo. Ka tan engmah ui a nei lo a, tih hreh pawh a nei lo, mahse sual a tluk erawh chu a duh ngai reng reng lo thung. Mipate a hun leh hmunin a zira kan chim chin a san tawh hi chuan, sual e sul lo e, engmah hi kan ngaihtuah thei tawh lo va, hma lam hun tur leh hnung lam hun, a engamah hi dawn loin kan buai zo vek tawh thin a nih hi, kan hrethiam vek awm e. Inngaihna suala tlu lova ka thu hnial bawk si lova hmangaihna kawng kan zawh dun chhung zawnga min hruaitu kha, ka fak ning lo va, ka theihnghilh thei lo a ni mai lo, ka dam chhung hian ka hre reng lo thei lo ang.

    Kum a lo thar, ni a lo tamin thla a liam zel a. Hmangaihna erawh a pangngai reng a, a ni, a thang lian chho zel zawk a. Hmangaihna par hmangaihna kawng zawhin kan tlan a, nikhat te hi a rei lo em em a, a chang thung chuan kumkhua emaw tih mai turin a rei bawk si thin. A ni e, ni khat chu sawi loh chawhma pawh a rei thin.

    Aitenawnpar, lungrun ka tanglai vuantu,
    Tawn loh kar ni chhun chawhma
    A rei vawng vawng.

    Chumi kum chuan an tul deuh avangin an riak zauh zauh fo thin a. An lo chu Luipui kam a nih avangin a phai deuh a. Mimkut thla a lo de, khua chu a thiang mawi thei em em mai a. Favang thereng an hram hlerh hlerh a, buh pawh chu a tha em em bawk. Puii chu sikserhin a damlo ta tlat mai a. Hmunpui han pan mai turin mitor-te a awm ve lo a, kan awmnaah lah motor a lut thei bawk si lo. Damdawi han lei mai turte a awm bawk si lo va, a khawsik chu a zual tawlh tawlh a, nikhua a hre ta mang lo va. Aw ka rilru a va buai thei thin em! A kianga awm reng chu ka chak ngawih ngawih a, mahse a rem lo va, a mawi ber bawk si lo.

    Zan lamah chuan nula tlangval hian an menpui thuap mai \hin a, a thih hun chu kan nghak a ni ta ber mai. Ka nupui a ni lo va, mahse ani chu ka hmangaih a, ani pawhin min hmangaih asin. Ka nupui ni law law se a zia tak a awm tur! Tuk khat chu tulna avangin lovah ka zu kal zawk a, rilru nuam lo em em leh kap tu nasa tak avangin hnathawh zai ka rel thei thlawt lo chu a ni ber mai. Buh kungte a sangin a hmuh a nuam em em a, a hring nghluh a, vau ngawpuiah chuan Rengchal a hram hlerh hlerh a, mahse ka tan chuan engkim mai hi a ngui zo vek a, khawvel hi a chul zo ta ni berin ka hria.

    Hma deuhah hmanhmawh takin ka haw thuai thuai a.  Dai ka han thleng Thingse buk a hnuaia kan chawlh thinna lungdawh ka thleng chiah tih chuan, mithi dar a rawn ri ta vu vu mai le! Tudang a ni lo, tih lah chu a chiang si.  Ka mit sulh a, lungdawhah chuan ka bawk thlawrh a, ka mittui hi a sur hian a sur nghal zung zung a, dan rual loh a ni.  Aw zah dawn lova theih nise awrawl tawp tawpa han tah hawm hawm mai chu ka duhin ka chak em em a, mahse chu zawng tlangval tan chuan tih chi a ni lo ve, ka rilru hi a na ngawih ngawih a, engmah ka hre zui ta lo.

    Ka han hriat leh chu, Pu Kunga ram kal haw chuan min sawi bawk bawk a, ka kaah te hian a rawn hamin ka dulahte min nem niin ka hria.  A hmel ka han hmu chu ka zak em em mai a, mahse ani chuan engmah a hai bik lo, “E, ka hrethiam che a lawm, thei la chu han tap hawm hawm la i veng hawk tur!” min ti a.  Ka insum zo ngang lo, ka rilru chu a pik mup mup a, Pa Kung, tih pahin a awmah chuan ka hmai ka phum a, a dana dan rual loh hian ka mittui chu a sur zung zung a, ka khur ngawt ngawt a, ka kut chuan a kawrhmaah chuan ka tham tawk tawk a.  Ani chuan min lainat em emin, ka nau, ka va lainat tak che em! a ti a-ani pawh a insum zo bik lo a ni ngei ang, a mittui chu a luang nguai nguai a.  Min kuah vawng vawng a.  Chutianga rei fe kan awm hnu chuan in lam pan chuan kan kal a, engmah sawi loin ani chuan kan inah min hruai lut a.

    Thei leh thei loin ka insil fai a, ka inthlak a, ka chhungte pawh tumah an awm lo.  Pu Kunga chuan Puii te in lam pan chuan min hruai a.  Kan va thleng chu mi an lo zi nuai nuai a.  Mahse in erawh chu an lo singsa fel tawh a.  Pawna mite chuan min han hmu chu an ding suau niin ka hria.  Tumah an tawng lo va, a reh nghal duak a, min en vek niin ka hria.  Pu Kunga chuan hma a hruai a, inah chuan kan lut ta a.  Puii nuin ka hmel a lo hmu chu, Puii saw i thianpa pawh a lo kal tawh asin, lo tho la lo be ta che, i va tihrilhhai em em ve, tiin a tap hawm hawm a.  Chutah a lo kal phei a, kei chu min kuah a,  Aw khawnge maw i thiannu chu i kalsan daih le, i hming a lam a lam a, ka hmu leh  dawn ta lo ani….., ni tin thlirin khilamah khian ka lo nghak mai ang, ka Nu rawn hrilh rawh aw…., ti in a rawn tawng chhuak asin, ka va han lainat tak che em, i thiannu a awm tawh lo…., a han ti chu zah ka sawi thei lo, ka insum zo ngang lo a ni e.  Ka mittui chu a sur hian a sur a, fiah lo ruai hian Puii khuma mu chu ka zu bawh thlawp a, a nghawngah chuan ka kuah a ka khur hlawk hlawk a.

    Chutih naka lai chuan Puii nu chuan min rawn kuah a, “Puii, hei i thianpa i bula hi a awm asin, a mittui tlate hi i hmu lo em ni, i khawngaih lo em ni?  Rawn hruk hulsak ta che, engatinge i kalsan, i van ti hrilhhai em em ve, Puii lo tho ta che, a han ti chu, a hnua an sawi leh danin in chhunga mi leh pawna awm zawng zawng nen, mittui tla lo leh tap lo an awm lo, an ti.  A ri a awrawl tawp tawpa han tah hawm hawm chu ka duh em em, mahse chu zawng ka ngam hlawl si lo.  Ka mittui chuan Puii biang leh bek sam chu a tihuh vek mai a.  Engtiang chiahin nge ka awm pawh ka hre lo.  Ka hriat meuh chuan Puii te thenawm inah min lo mut a, min lo buaipui hle niin ka hria.  Chutia ka han harh min hmu chu Pu Kunga bawk kha ka kiangah chuan a lo awm a, engmah sawi loin min en a, ani pachang meuh pawh a insum zo bik lo a ni ang, a mittui chu a luang nguai nguai a.

    Chutah Puii nu chu a lo lut a, min han en chu engmah sawi loin min kuah a, a tap hawm hawm a, in chhunga min buaipuia lo awm dangte pawh chu an insum thei bik lo a ni ang, an inhnit hlawp hlawp vek niin ka hria.  Chung zawng zawngte chu khua rei tawh mah ni sela, ral khata khaw tereuh tea rangva in chung lo langte ka han hmuh chuan ka rilruah a lo thar uai uai a.

    A ni e, mite pawhin an sawi sep sep, a hma zawnga nikhua hre lova khawsika awm, a thih dawna a nu hnena thu a sawi a thi zui ta maite kha mi mak tih a tling a.  Ka tan chuan a hrehawm em em a, ka sun a ni, ka tuar a ni, tih chu tlang hriat mah nise, tuar ang em em a han awm leh khawsak lah chu a zahthlak bawk si.  Ka nupui chu nita zawk law law se, a zia tak pawh a awm zawkin ka ring thin.

    Chhim lam tlang thlira chutianga nun hlui liam tawh ka ngaihtuah chu engdang mah ka lo hre chang lo va.  Kan thlanga motor lo tlan chho, kan bul lawka ding atang chuan mi pakhat hian, “I va han ngaihtuah ding awm veng veng ve aw, zing a nih hi, thla en zan pawh a nih loh hi, nun hlui I ngaihtuah leh tawh pek em ni? A rawn tih chuan ka harh zawk a.  Sana ka han en a, dar riat leh a chanve lai a lo ni tawh a.  Tukthuan ei pawh a lo hun ta hial a.  Tichuan inkhawm te kan duh ve avangin tukthuan ei tur chuan ka lut ta nghal a.