Zohnahthlakte insuihkhawmna chungchang hi a vei pawl leh a buaipuitu kan tam tawh hle a. Heti lam pang hawi Article pawh kan chhiar ta malh malh mai. MZP pawhin hnapui berah an neih hial a. Engemaw changin Mizo chi peng thenkhat MIZO-a lawmluh an nei leh kauh bawk thin. A lawmawmin heti lam hawia an hmalakna hi a fakawm tak zet mai. Ramtin ramtanga awmdarh Mizo te hian insuihkhawma, zaikhata luanga, kan hnam a tha zawnga khawvel hriata phochhuah hi kan tihtur a ni. Chumi tura tam takin hma an lak mek laia, a tikhawlhkhamtu leh chu hmalakna parchhuah tir thei lotu thenkhatte inbih chiang dawn teh ang.

ZORAM MIPUI TEN HMUI KAN NER HMA LUA
Zohnahthlakten mahni hnam bil ang a ram kan neih awm chhun, Mizoram chhunga chengte rilru hi a dik tawk tlat lo. Kan rilru dik loh zia chu mitinte a hrechiangtu kan ni. Kan Zohnahthlak te zing a mi tam tak, Duhlian tawng hmang lo, Mizoram chhunga awm an tama. Kan zingah intineitu leh tlangnel takin anmahni chi bil tawng an hmang bawrh bawrh a. Chu chu an tihawm reng leh an tihtur pawh a ni. Mahse an tawng ki leh thluk dan avanga, kan mitko kan san a, kan hmui kan ner khum zel thin hi chu thil diklo leh kan tih miah loh tur a ni. Duhlian tawng an hman loh avang khan kan unau an nihna a bo chuang lova, anni kan hmuhsit khan keimahni inhmusit kan ni ringawt.
      Zohnahthlak tena kan tawng inhriat tawn theih ber chu Duhlian tawng, Mizorama cheng ten Mizotawng kan tih hi  a ni a. He duhlian tawng an hman loh avanga kan hmu sakhi mai leh, hnamdang melha kan melh nghal hu a nih chuan, inpumkhatna kawng chu a kaw lo nghal phawt. He rilru dik lo tak hi kan paih hma chuan, Mizoram mipuite kaltlang hi chuan inpumkhatna kawng hi a kaw lo mai pawh ni lovin, innghirnghona leh, chi leh chi inkara intaina a kochhuak fo ngei ang.

CHAWIMAWI TLAKTE CHAUH EM NI MIZO CHU?!
Ram hrang hrangah Zohnahthlakte kan awm darh ta viau mai a. A tlangpuiin Mizoram mipui tak ai chuan Manipur leh Myanmar lam kan unaute zingah khawvel zauzawk daidartu hi an tam zawk a. Chu chuan a tha zawng leh tha lo zawngin hmuntinah Mizote min phochhuak mek a ni. Hemi kawnga Zoram mipuite rilru leh ngaihdan hi a dik lo hulhual bawk. U.S.A -ah Myanmar lam  Zohnahthlak zinga miin hmingthatna a khum a, Mizo tiin chhuang takin he Zoram chhungah ngei hian kan puangchhuakin kan lawmpui thin. Myanmar lam atanga Zohnahthlak lo chhuk thenkhat ten Mizoram tihmingthain, India ram mai ni lo, khawvel huap ang pawhin Mizo hming an ti thang a. Kan lawmpuiin kan chhuang a, ani chu Myanmar mi a lawm, Burma mi a lawm kan ti tawh lo. A hmingthatna kha kan hmingthatna a nih miau avangin, en hranloh dan kan zawng a, Mizo a nih zia thu kan tlangaupui nasa thei hle. Kan Zohnahthlakpui hmingthatnaa kan chawimawia kan chawisang chu a lawmawm tak meuh a. Ramdanga Zohnahthlak awmten hmingthatna an khum avanga kan lo intithei pawh chu a mawh love. Mahse kan thlir dan dang zawk hi i chhut chiang teh ang.
       U.S leh Ram danga Myanmar lam Zohnahthlak thenkhat ten hmingchhiatna an khuma, min tihmingchhia Burma mi an ni chuti khati kan ti leh si. Mizoram chhungah a kawhmawhbawl pawl thenkhat ten hmingchhiatna an khum a, damdawi leh thildang vangtein Mizoramah harsatna min rawn thlen a, chutah meuh chuan MIZO an nihna kan thaibo saka, Burma mi tiin, MIZO a nihna kan hriatpui tawh lo. A pawng a puiin kan vaihma tawh a, an ram lama hawng turin kan nawr nghal chuk chuk a, "Burma mi ho lah hi Mizoramah buaina an rawn siam a," kan ti a. Thil engemaw deuh lo thleng se, 'ani chu Burma mi a lawm' kan ti thla zen bawk si. He kan rilru puthmang dik lo tak avang hian an rilru kawng tamtakah kan tihel ngeiin ka ring thin. India ram hi tuna Myanmar dinhmuhah dingin, Myanmar khi India ram dinhmun angah hian ding ta se, eng nge Zoram chhunga chengte hian kan an chiah ang le?
 Ramdanga kan Zohnahthlak pui awmte leh, he Zoram chhung ngei a kan Zohnahthlak Duhlian tawng aia anmahni hnambil tawng thiam zawk leh hmuntin atanga Mizoram rawn pankhawmtute hi, hmingthatna an khum niah chauh em ni Mizo anga kan pawm dawn le? Hmingchhiatna an khuma, a chhe ber an thlen ni pawhin Mizo an nihna a bo chuang dawn em ni? Nge tha bik chuang lo leh rilru dik lo pu Mizoram mipui te hian a tha leh fel, hmingtha te chauh kan hnama pawm kan duh? He rilru dik lo hi kan faten an chhawm chho tan zel leh nghal a. A letling thawk hian hmundanga kan Unau awmte hian rilru tha lo an chhawm nun phah ve mai lovang maw? Rilru dik leh inpumkhat zawnga kan fateah pawh zirtirna kan pek a, chu rilru chu kan chhawm nun a van tul em. Chuti a nih loh chuan kan inkar a chhe tawlh tawlh ang a, Mizo leh Mizo kan in mu leh ar hun hi a lo thleng thuai ang.

DUHLIAN TAWNG AIA MAHNI HNAMBIL TAWNG HMANGTE BEN HARH IN NGAI

Buaina leh harsatna tawh chauhva Mizo ka ni inti hi kan Zohnahthlak Unaute zingah hian an awm leh fo thin. Eng emaw changa Mizo ka ni ti leh duh miah si lo, ngeiawm duh tak a ni. Kei ngei pawhin, kan Zohnahthlak thenkhat, "Mizo ka ni lo" ti hi ka tawng leh zauh thin. Heng ho te hian harsatna intawhni chauh leh tanpui in ngaih ni chauh va Mizo nih intum hian, he Mizoram chhunga cheng Zohnahthlakte rilru hi a tihel ve a sin. Harsat leh Mangan ni pawh a inpeizawn dial dial a, lawm ni leh hlim ni pawh a inlawmpuia, kan nihna hai ngai lo Mizote kan nih thin vei nen. He rilru hi chu inpaihthlaka in kalsan der a ngai a ni. Tin, Zoram chhung leh pawnah pawh, Duhlian tawng hi Zohnahthlakten kan thiam tlan leh kan inbiak pawhna ber a nih avangin, kan khawlai lenna leh Zohnahthlak dangte awmnaah chuan mahni hnam bil tawng hman bik tlat tum teh suh u. Mahni inchhung khur leh awmna hmunah in hman theih tho kha. Chuvangin kan inbiaktlan theihna leh, Zohnahthlak ten kan thiam tlan ber tawng, Duhlian tawng hman hi tlawmngai lo hram teh u. Hnam peng ni reng si a, hnampui anga in ngaih tlatna chapona hi paih thlain, eng dinhmunah pawh ding ula, khawi hmunah pawh Zohnahthlak zing a mi i nih kha hrechiangin, lanchhuahpui ngam fo zawk teh.

MIZORAM TAN CHHIATNA IN THLEN NASA
Mizoram chhunga Zohnahthlakte rilru tiheltu leh rilru dik lo tak puttirtu chu, Damdawi leh thiltha lo dang chung changa Myanmar leh Mizoram pawn lam Zohnahthlakte inrawlh nasa lutuk hi a ni a. Damdawi tam tham man se, Myanmar lama kan Zohnahthlakte zing a mi in nih loh leh, Mizoram pawn atanga rawn pem lut in ni fo bawk. Chu chuan thil thalo tak mai, nangmahni enhranna leh hmusitna, ngaihhniamna rilru a siam nghal a sin. Chu chuan a rampum anga rinhlehna a siamin, inpumkhatna tur zawng zawng a ti chhe nghal vek bawk. A bik takin myanmar lama kan Zohnahthlak awmte, Sumdawnna dik lo leh tenawm, Mizoram chhunga in unaute tihchhiatna tur in siam khan huatna thinlung, sernung reh thei hauh lo chu,  Mizoram chhunga Zohnahthlak awmte rilruah hian a siam thei a, a siam mek bawk a ni tih hi ngaihtuah ve lul teh u. I unau i hmangaih loh chuan tunge i hmangaih chuan(g) ang.

HNAM ANG A KAN DINCHHUAH A TUL
Dinhmun inthlak reng khawvel, a chak, thei leh thiam te dinchhuahnaah hian Zohnahthlakte hi hnam anga kan inpumkhat lo a nih chuan tuna kan thlen chin atang hian hnungtawlhin, hnam anga min dintu Pathian pawi tawkin, chimralin kan la awm ngei ang. Mizorama awm Zohnahthlak ten Vai chim ral kan hlau reng a, he thil tireh tur chuan Zohnahthlak tinte lungrualna hi thil pawimawh berte zing a mi a ni ngei  ngei ang.

RILRU INPAWHTAWNNA A PAWIMAWH TA
Kan khawvel kalphungah, kan awmna hmun leh ram hi a danglam kher lo ang. Myanmar-a awmte chu Myanmar-ah, India-a awmte chu India-ah chutiang zelin hmun hran leh ram hranah awmin. Ram khat rorelna hnuaiah awm lo mah ila. Zohnahthlakte insuihkhawmna kawng awmchhun ni a lang leh kawng hmasa ber ni a lang chu, kan rilru lam inpawm tawnna leh inpawh tlanna hi a ni. Chuvangin Zohnahthlakte hi inpumkhata hnamkhat anga khawvel hriata kan awm theih nan, rilru dik tak puin, hmuntina Zohnahthlak awm te hian kan tihtur hi i ti theuh teh ang u.